:: vijayabhanunews ::

తాజా వార్తలు

పవన్-నితిన్ సినిమా షూటింగ్ స్టార్ట్!

పవర్‌స్టార్ పవన్ కల్యాణ్, యంగ్ హీరో నితిన్ మధ్య మంచి అవినాభావ సంబంధం ఉంది. నితిన్ తన కొత్త సినిమా ఆడియో ఫంక్షన్లకు తన అభిమాన హీరో పవన్ కల్యాణ్‌ను ఆహ్వానిస్తుంటాడు. తన సినిమాల్లో కూడా పవన్ ప్రస్తావన తీసుకొస్తుంటాడు. పవన్ కల్యాణ్ అంటే అంత పిచ్చి నితిన్‌కి. అలాంటిది ఇప్పుడు పవన్ కల్యాణ్ నిర్మాతగా నితిన్ హీరోగా కొత్త సినిమా తెరకెక్కుతుండటం ఆసక్తికరం. నితిన్‌ను హీరోగా పవన్ కల్యాణ్ క్రియేటివ్ వర్క్స్, శ్రేష్ఠ్ మూవీస్ సంయుక్తంగా ఈ సినిమాను నిర్మిస్తోంది. ఈ కొత్త సినిమా రెగ్యులర్ షూటింగ్ సోమవారం నుంచి హైదరాబాద్‌లో ప్రారంభమైంది.

ఈ సినిమాకు ప్రముఖ దర్శకుడు త్రివిక్రమ్ శ్రీనివాస్ కథను అందించగా.. ‘రౌడీ ఫెలో’ ఫేం కృష్ణ చైతన్య దర్శకత్వం వహిస్తున్నారు. హైదరాబాద్‌లో ఐదు రోజులపాటు తొలి షెడ్యూల్‌ను పూర్తిచేసుకున్న తరవాత ఆగస్టులో చిత్ర యూనిట్ అమెరికా బయలుదేరుతుంది. అక్కడ లాంగ్ షెడ్యూల్ ఉంటుంది. ‘అ ఆ’కి అద్భుతమైన సినిమాటోగ్రఫీని అందించిన నటరాజ్ సుబ్రమణ్యన్.. ఈ సినిమాకు పనిచేస్తున్నారు. ఎస్.ఎస్. థమన్ సంగీతం అందిస్తున్నాడు. ‘లై’ సినిమాలో నితిన్‌కు జంటగా నటించిన మేఘా ఆకాష్ ఈ కొత్త సినిమాలోనూ చాన్స్ కొట్టేసింది. కాగా, ప్రస్తుతం నితిన్ నటించిన తాజా సినిమా ‘లై’ పోస్ట్ ప్రొడక్షన్ పనులు జరుగుతున్నాయి. ఈ సినిమా ఆగస్టు 11న ప్రేక్షకుల ముందుకు రానుంది.